Ringritja e biznesit nga tërmeti – Dhoma e Tregtisë: Qindra të dëmtuar në Durrës, premtimet që na dha Denaj!
120 biznese të mëdhenj dhe mbi 900 të vegjël kanë pësuar dëmtime nga tërmeti i 26 nëntorit në Durrës. Nisur nga kjo situatë, Dhoma e Tregtisë dhe Industrisë Durrës kërkon ndërhyrjen e qeverisë për marrjen e masave me qëllim minimizimin e efekteve negative në ekonomitë familjare dhe në ekonominë e vendit.
Kreu i Dhomës, Alban Isteri thotë për Tv Scan se pas shkresës zyrtare të dërguar disa ditë më parë është zhvilluar edhe një takim me ministren e Financave, Anila Denaj dhe atë të Sipërmarrjes, Eduard Shalsi ku ndër të tjera është kërkuar rimbursimi sa më shpejt i TVSH-së si dhe moratorium 3-vjeçar për taksat që paguajnë sipërmarrjet e këtij qarku. Po ashtu, kreu i dhomës konsideron si nevojë urgjente nisjen e vlerësimit të dëmeve, nëpër biznese.
Isteri thotë se përfaqësuesit e qeverisë i kanë konsideruar të drejta kërkesat e tyre, ndërkohë që Denaj ka premtuar se çështja e TVSH-së do të shikohet me prioritet.
Pjesë e takimit ishin edhe përfaqësues të Shoqatës së Bankave, duke qenë se një nga kërkesat e biznesit është shtyrja me një vit e shlyerjes së kësteve, nga bizneset kreditore. Gjithashtu, nevojitet lëvrimi i shpejtë i fondeve për bizneset e siguruar e për këtë arsye është kërkuar ndërhyrja e Autoritetit të Mbikëqyrjes Financiare.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.