Rinisin kreditë e buta, ja si të përfitoni

Pas tre vitesh ndërprerje, Bashkia e Tiranës ka rinisur këtë muaj programin e kredive të buta, duke u dhënë mundësinë qytetarëve që të përfitojnë kredi kundrejt interesave preferencialë deri në 3 për qind, ndërsa pjesa tjetër subvencionohet nga ky institucion.

Në buxhetin e miratuar në fund të vitit që lam pas janë vendosur në dispozicion 95 milion lekë, për financimin e normave të interesit për rreth 1 mijë kredi në total. Por cila është rruga që duhet të ndjekin qytetarët për të përfituar? Me një kartë identiteti dhe një çertefikatë familjare, qytetarët e interesuar duhet të drejtohen pranë zyrave të urbanistikës të njësisë bashkiake ku figurojnë të regjistruar, për të plotësuar një formular me informacion të përgjithshëm për aplikuesin.

Më tej kjo zyrë, depoziton formularin në Bashkinë e Tiranës, dhe aplikuesi(individ ose familje) kalon në fazën e plotësimit të dokumentacionit të nevojshëm. Në total janë 17 dokumente që duhen paraqitur pranë zyrave të Bashkisë, ku më penalizuese janë disponimi i një prone dhe mosplotësimi i të ardhurave të kërkuara apo tejkalimi  i tyre.

Sa i përket të ardhurave, një individ aplikues apo një çift duhet të kenë nga 31.007 lekë deri në  51.240 lekë të ardhura mujore, një familje me 2- 3 persona duhet të ketë 41.865-65.964 lekë të ardhura, një familje me 3-4 persona duhet të ketë 54.153-84.035 lekë të ardhura mujore dhe një familje me 4- 6 persona duhet të arrijë pragun e të ardhurave nga 68.585-107.142 lekë në muaj.

Dosjet e aplikuesve më pas kalojnë për verefikim në Drejtorinë e Strehimit të Bashkisë dhe më tej kalojnë për miratim në Këshillin Bashkiak. Masa e përfitimit fillon nga 3.7 milion lekë me trend rritës në varësi të numrit të anëtarëve të një familje.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.