Rinovimi i konvikteve – Komisioni i Ligjeve voton grantin 2.03 mln euro nga qeveria gjermane

Godinat  e strehimit të studentëve, pranë Qytetit Studenti do t’i nënshtrohen një rinovimi të plotë për përmirësimin e kushteve dhe eficencën e energjisë. Qeveria gjermane jep grantin prej 2.03 mln eurosh për investim, grant i cili ka kaluar me të gjitha votat në Komisionin për Çështjet Ligjore, Administratën Publike dhe të Drejtat e Njeriut.

Por sipas deputetes së Partisë Demokratike, Dhurata Çupi, ky grant vjen në një kohë ku ende nuk është ratifikuar i pari  në shumën prej 4.5 mln eurosh, pretendim i cili është hedhur poshtë nga zv ministri i infrastrukturës dhe energjisë, Ilir Bejtja

“Pse 4.5 milionë euro nuk ratifikohet në marrëveshje dhe ju detyron qeveria gjermane që 2 milionë euro t’i ratifikoni me marrëveshje?”, pyeti  Çupi.

“4.5-sa ka kaluar. Kampusi universitar i referohet qytetit Studenti 1 dhe konviktet e qytetit studenti, ky është kampusi universitar”, u përgjigj Bejtja.

Ky është granti i dytë i qeverisë gjermane , i pari është ratifikuar në parlament  në vitin 2016. Shuma e dhuruar  nga qeveria gjermane në këto dy vite për rinovimin e konvikteve është  6.53 milionë euro.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.