“Rishikoni planet për aeroportin e Vlorës” – Konventa e Bernës, apel qeverisë: Ndërtimi në zonë të mbrojtur, me vlera të larta natyrore

Byroja e Komitetit të Përhershëm të Konventës së Bernës i ka bërë thirrje qeverisë shqiptare të rishikojë planet për ndërtimin e aeroportit të Vlorës. Komiteti ndau shqetësimin e thellë në lidhje me planet për urbanizimin e zonës së mbrojtur Vjosë-Nartë, duke theksuar vlerat e njohura natyrore të zonës. Ndërkohë që,  për këtë arsye u kërkua  zbatimin e një regjimi të fortë mbrojtje.

Çështja e projektit të aeroportit të Vlorës u përfshi në ankesën e depozituar më parë nga  EcoAlbania mbi Ndikimet e pritura negative të ndërtimit të hidrocentraleve në lumin Vjosë,  ku ndërtimi i aeroportit në Vjosë-Nartë është përfshirë si një rrezik iminent në ekosistemin e deltës së  Vjosës. Në muajin qershor të këtij viti, Këshilli i Ministarve miratoi kontratën e partneritetit publik privat për aeroportin e Vlorës, duke avancuar në procedurat për zbatimin e këtij projekti.

Sipas legjislacionit në fuqi, kontrata koncesionare do të duhet të miratohet edhe në parlament, përpara se ajo të hyjë në fuqi. Ndërkohë që, sikurse është bërë e ditur kohëzgjatja e koncesionit do të zgjatë për një periudhë 35-vjeçare, teksa oferta e dorëzuar nga konsorciumi fitues, që dominohet nga komapnia Mabetex Group e biznesmenit nga Kosova Behgjet Pacolli është 104 mln euro. Ndërkaq, më herët 40 organizata kombëtare dhe ndërkombëtare i kanë kërkuar qeverisë të anulojë projektin për ndërtimin e aeroportit të Vlorës në zonën e Vjosë-Nartës, duke vënë në dukje se vendi në të cilën planifikohet të ndërtohet kjo vepër aeroportuale bie brenda zonës së mbrojtur.

Koalicioni i organizatave mjedisore theksoi se ndërtimi i një infrastrukture të tillë brenda zonës së mbrojtur shkel në tërësi kuadrin ligjor për ruajtjen e natyrës dhe në veçanti ligjin e Zonave të Mbrojtura dhe një sërë konventash të cilat Shqipëria i ka ratifikuar. Sipas tyre, kjo është vënë në dukje edhe në raportin e fundit të Komisionit Evropian për Shqipërinë e për pasojë, ndër të tjera krijon pengesa edhe në rrugën e integrimit të vendit në Bashkimin Evropian. Paralelisht, Shqipëria ka ratifikuar Konventën e Bernës në janar të vitit 1999 dhe zbatimi ka hyrë në fuqi në maj të po këtij viti. Dhunimi i kësaj konvente mund ta përballë vendin me presion dimplomatik si dhe me sanksione të ndryshme që mund të ndërmerren nga Bashkimi Evropian apo në mënyrë të njëanshme nga vende të tjera që kanë ratifikuar këtë konventë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.