Risi në Gardën e Republikës – Prezantohet projektligji që përmban ndryshimet e reja të institucionit

Komisioni për Sigurinë Kombëtare ka mbajtur një konferencë ku është folur për shqyrtimin në parim të projektligjit “Për Gardën e Republikës së Shqipërisë” ku të ftuar kanë qenë zv.ministri i Brendshëm Julian Hodaj dhe Sekretarja e Përgjithshme e MB, Elena Pici.

Zëvendësministri i Brendshëm Julian Hodaj prezantoi projektligjin “Për Gardën e Republikës”, ku u shpreh se: “Projektligji i ri adreson disa parime që fillojnë që nga respektimi i të drejtave themelore të njeriut deri tek mënyra sesi këto parime do të zbatohen në praktikë”.

Çështje tjetër është edhe roli i Ministrit përgjegjës për Rendin dhe Sigurinë Publike, si organi kryesor politik dhe që ka drejtimin strategjik të Gardës, kuptohet në raport dhe harmoni të plotë i asaj që është edhe roli i ministrit në krahasim me strukturat e tjera të varësisë që kryejnë po funksione në fushën e sigurisë publike.

Risi e tretë e projektligjit është përcaktimi më i qartë i kritereve për emërimin, lirimin nga detyra të Drejtorit të Përgjithshëm, si dhe përgjegjësitë specifike.

Duke shkuar edhe tek detyrat specifike që duhet të kryejë Garda e Republikës, ku në ligjin ekzistues janë shumë të përgjithshme dhe mund të çonin në probleme për interpretimin e tyre. Por duke i përcaktuar më qartë i jepet edhe formë asaj që duhet të jetë institucioni i së ardhmes.

Risi tjetër është njehsimi apo përshtatja e organizimit të brendshëm qoftë në terma rekrutimi, trajnimi, edukimi, ecuri në karrierë apo gradash me ato që janë edhe institucionet e tjera në varësi të Ministrisë së Brendshme.

Me ligjin e ri është implementuar e njëjta logjikë me SHÇBA-në duke ju dhënë grada civile. Pra edhe sistemin e gradave të Gardës së Republikës së Shqipërisë, që deri më sot janë sipas konceptit ushtarak t’i kthejë në grada civile dhe do të kemi më së fundi tre institucionet kryesore në varësi të Ministrisë së Brendshme që kanë të njëjtin sistem jo vetëm gradash por edhe rekrutimi dhe promovimi në karrierë.

Kjo risi eleminon edhe atë që mund të ishte paqartësia e krijuar ndër vite në lidhje me statusin që një organizatë mund të ketë në raport me tjetrën kur kryejnë detyra që i përkasin të njëjtës fushë përgjegjësie.

“Projektligji vjen si një projektligj i ri, për shkak edhe të detyrimeve që kemi ndaj parimeve të teknikës legjislative duke qenë se meqë ndërrohet më tepër se gjysma e neneve duhet të vijë me një projekligj të ri dhe jo thjesht amendime të ligjit ekzistues”, është shprehur Hodaj.

“Sa i përket pjesës buxhetore nuk kemi probleme në këtë pjesë pasi numri mbetet i njëjti i punonjësve të Gardës së Republikës dhe sërish Garda edhe me organizimin e ri do të funksionojë me të njëjtat numra. Pra, nuk ka efekt financiar”, ka përfunduar Hodaj

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.