Risitë e bankave – Ja çfarë do të ndryshojë në vitin 2018
Viti 2018 pritet të sjellë risi dhe zhvillime që do të ndikojnë në marrëdhëniet mes bankave dhe sektorit privat. Risia e parë, e hyrë në fuqi që nga 1 janari, është detyrimi për dhënien e kredive mbështetur vetëm në bilancet zyrtare të bizneseve.
Megjithatë, sipas bankave, kjo çështje ka nevojë për qartësime në kuadrin rregullativ të Bankës së Shqipërisë. Qartësimet lidhen me rolin dhe rëndësinë që do të kenë informacionet dhe analizat shtesë që kryejnë vetë bankat rreth kredimarrësit, përtej të dhënave të bilanceve zyrtare.
Gjithashtu, një çështje që mund të kërkojë qartësim është mënyra sesi do të sanksionohen bankat, nëse nuk e respektojnë detyrimin për të marrë në konsideratë vetëm të dhënat e bilancit që dorëzohet në tatime. Një projekt tjetër i rëndësishëm i sistemit bankar është ngritja e një sistemi të brendshëm pagesash në euro.
Ky propozim i është paraqitur Bankës së Shqipërisë, që pritet të marrë shumë shpejt një vendim. Ngritja e një sistemi pagesash në euro do të ulte në mënyrë drastike kostot e transfertave të brendshme bankare në euro. Aktualisht, këto transferta kalojnë përmes bankave korrespondente jashtë vendit dhe kushtojnë disa herë më shumë se transfertat në lekë.
Një projekt tjetër që po diskutohet nga Shoqata e Bankave është ngritja e një Byroje të Kredisë. Fillimisht, ky projekt u ideua si një mënyrë për të vendosur një sistem pikëzimi të kredimarrësve.
Megjithatë, kjo qasje po anashkalohet, duke qenë se një vlerësim i tillë i takon politikave të secilës bankë. Bankat janë më shumë të prirura ta shohin Byronë si një instrument që mund të ndihmojë në menaxhimin e informacionit për kredimarrësit, duke pasuruar të dhënat që disponohen nga Regjistri i Kredive të Bankës së Shqipërisë.
Banka Europiane për Rindërtim dhe Zhvillim do të financojë një konsulent për zgjedhjen e një modeli të përshtatshëm për ngritjen e Byrosë së Kredisë. Një skenar parashikon që Byroja e Kredisë të përfshijë të dhëna jo vetëm nga shoqëritë financiare, po edhe nga kompanitë, përfshi ato të shërbimeve utilitare, si energjia, uji dhe telefonia apo nga bizneset që kreditojnë vetë blerjet e klientëve.
Kjo do të evidentonte borxhlinjtë e këqij jo vetëm brenda sistemit financiar, por edhe më gjerë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.