Ristrukturohen “drejtoritë e parave” – Thesari i “rikthehet” ministrisë. Doganat ndryshojnë strukturë!

Këshilli i Ministrave ka miratuar dy vendime që në thelb ristrukturojnë drejtori të rëndësishme të financave shqiptare. Vendimi i parë është ai për ristrukturimin e Thesarit. Refreuar vendimit, degët e thesarit do të funksionojnë si degë territorial të Ministrisë së Financave. Numri i degëve do të vijojë të mbetet i njëjtë, 36 të tilla. Buxheti i tyre është pjesë e buxhetit të sistemit të ministrisë përgjegjëse për financat.

Misioni i degëve të thesarit është kontrolli financiar dhe kontabël për miratimin e transaksioneve të njësive shpenzuese dhe arkëtuese buxhetore, në përputhje me legjislacionin në fuqi, si dhe raportimi i të dhënave të realizimit të buxhetit.

Vendimi përcakton se drejtuesi i degës territoriale i raporton e i jep llogari drejtpërdrejt sekretarit të përgjithshëm të ministrisë përgjegjëse për financat. Në përditshmërinë e punës së tyre, degët e thesarit komunikojnë dhe raportojnë pranë drejtuesit të njësisë përgjegjëse për thesarin në ministrinë përgjegjëse për financat.

Praktikisht, në këtë rast zhbëhet vendimi i vitit 2008.

Po ashtu, një vendim tjetër i qeverisë është ai për ristrukturimin e Drejtorisë së Përgjithshme të Doganave, duke përcaktuar një rol më të rëndësishëm të koordinatorit kundër korrupsionit që tashmë do jetë pjesë e Rrjetit Kombëtar të Koordinatorëve. Vendimi përcakton gjithashtu se organika e Drejtorisë së Përgjithshme të Doganave do të jetë me 1 mijë e 74 punonjës, të shpërndarë në nivel qendror dhe vendor, duke pasur një rritje të vogël të numrit të punonjësve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.