Rivlerësimi i pasurive të paluajtshme – Shtyrja e afatit dha efekte pozitive për formalizimin
Vendimi i Qeverisë për shtyrjen e afatit të rivlerësimit të pasurive të paluajtshme dha efekte pozitive, si për qytetarët ashtu edhe për buxhetin e shtetit. Sipas krerëve të Financave publike, shtyrja e afatit argumentohet me nevojën për t’u dhënë më shumë kohë qytetarëve për të përfituar nga procesi i rivlerësimit të pasurisë me tarifë 2%.
Nga të dhënat zyrtare që disponon Ministria e Financave, nga periudha 1 shtator 2016 deri me 25 mars të vitit 2017, rezulton se numri i aplikimeve për rivlerësimin e pasurisë së paluajtshme në total është 37 mijë, për një vlerë totale mbi 3.1 miliardë lekë.
Si rezultat i uljes së tatimit nga 15 % në 2 %, qytetarët kanë kursyer 20.2 miliardë lekë, ose gati 200 milion dollarë, ndërsa vlera e pronës së tyre është rritur me 155.5 miliardë lekë ose 1.5 miliardë dollarë.
Vetëm dy muaj më parë qeveria mori vendimin për shtyrjen e afatit të rivlerësimit të pasurive nga fundi i muajit shkurt që ishte, në 31 Maj të këtij viti. Kjo sipas Ministrisë së Financave, është bërë për t’ju ardhur në ndihmë qytetarëve. Ky proces pritet të ketë efekte financiare edhe në të ardhurat e buxhetit të shtetit për vitin buxhetor 2017.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.