Romë, uji me orar – Emergjenca, autoritetet lokale racionojnë furnizimin
Gjendja e emergjencës në Itali, e veçanërisht në Romë, ka detyruar 20 komuna në kryeqytet që të ndërmarrin një vendim drastik; racionimin e ujit. Në këto vende, furnizimi me ujë është pezulluar në disa orë të ditës.
E njëjta masë mund të merret edhe nga komuna të tjera, dhe mund të prekë deri në 1.5 milionë banorë, në varësi të situatës. Prej javësh Italia është në një krizë thatësire ndërkohë që Roma rrezikon që shumë shpejt të mbetet pa ujë. Fillimisht, bashkia filloi të mbyllte çezmat tradicionale që gjenden në çdo cep të qytetit, me një hap prej 20 çezmash në javë, ndërkohë që tani, kufizimet duket se do të shkojnë në shtëpitë e gjithsecilit.
Nuk ka ndodhur asnjëherë më parë kjo gjë”, shprehet Christina, një banore e kryeqytetit. “Sasia e ujit është vërtetë e vogël, pasi nuk ka rënë shi gjatë dy tre muajve, sidomos në jug të vendit. Prandaj duhet të tregohemi të kujdesshëm kur përdorim ujin”, thotë një tjetër banor.
Një ditë më parë autoritetet lokale urdhëruan ndërprerjen e furnizimit me ujë nga liqeni Bracciano, pasi uji ka zbritur nën nivelin e zeros hidrike, çka ka detyruar komunat që të racionojnë ujin.
Niveli ka rënë aq shumë sa rrezikon një katastrofë ambientale. Pezullimi mund të qëndrojë në fuqi deri në 31 Dhjetor të këtij viti. Vendimi është kritikuar ashpër nga kompania e furnizimit me ujë në Romë. Në rast se nuk do të gjendet një zgjidhje tjetër, atëherë furnizimi me ujë mund të ndërpritet deri në 8 orë në ditë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.