Rosneft shet naftën e Venezuelës – Furnizon klientët në Kinë dhe Indi, shmang sanksionet e SHBA

Kompania shtetërore ruse, Rosneft, është bërë tregtari kryesor i naftës së Venezuelës, duke gjetur blerës kryesisht në Kinë dhe Indi dhe duke e ndihmuar Karakasin zyrtar të kompensojë blerësit që ka humbur, të cilët nuk dëshirojnë të thyejnë sanksionet e Shteteve të Bashkuara.

Sipas të dhënave, Rosneft është bërë blerësi kryesor i naftës së Venezuelës në Korrik dhe në gjysmën e Gushtit. Kompania ruse bleu 40% të naftës që prodhoi kompania shtetërore e Venezuelës, PDVSA në korrik dhe 66% në gusht, duke dyfishuar sasinë, krahasuar me periudhën përpara sanksioneve.

Rosnef, që prodhon rreth 5% të naftës në botë, tashmë po kujdeset për operacionet e transportit dhe marketingut për pjesën më të madhe të eksporteve të Venezuelës. Kryesisht, Rosnef furnizon klientët në Kinë dhe Indi, ndërkohë që kompanitë tregtare si Trafigura dhe Vitol, të dyja me bazë në Zvicër janë tërhequr, për shkak të frikës së mund të shkelin sanksionet e Shteteve të Bashkuara.

Nafta përbën rreth 95% të të ardhurave të Venezuelës nga eksportet, ndërsa Uashingtoni ka paralajmëruar shtëpitë tregtare dhe blerësit e tjerë se do të përballen me sanksione nëse bëjnë biznes me Karakasin.

Gjithashtu, Uashingtoni dhe disa qeveri të tjera perëndimore e kanë njohur si president liderin e opozitës në Venezuelë, Juan Guaido, dhe po përpiqen të largojnë presidentin aktual, socialistin Nicolas Maduro.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.