Rregulla për fondet e investimeve/Pas një viti “kopsitet” drafti. Më shumë kursime në tregje

Ministria e Financave ka përfunduar dhe depozituar në komisionet parlamentare projektligjin që synon të vendosë rregulla të qarta loje për sipërmarrjet e investimeve kolektive.

Projektligji në fjalë për të cilin është punuar për një vit nga autoritetet kompetente,  ka si qëllim bërjen e sektorit të fondeve me tërheqës për pjesëmarrësit e tregut dhe investitorët;  krijimin e një game më të gjerë të fondeve të përshtatshme për tregjet shqiptare dhe evropiane;  mobilizimin e më shumë kursimeve në tregjet e kapitalit dhe në ekonomi; t`u ofrojë investitorëve më shumë mundësi zgjedhjeje si dhe  rritjen e shkallës së mbrojtjes së investitorëve.

Ky ndryshim ligjor ndërmerret në një kohë ku dinamika e tregut të fondeve të investimeve ka pësuar zhvillime të mëdha të cilat nuk i përgjigjen kërkesave të tregjeve evropiane dhe iniciativa ndërmerret në kuadër të anëtarësimit në BE.

Drafti rregullon themelimin, regjistrimin dhe veprimtarinë e shoqërive administruese të fondeve, të shoqërive administruese të sipërmarrjeve të investimeve kolektive me ofertë publike dhe të shoqërive administruese të fondeve të investimeve alternative në vend.

Në draft,  përcaktohet se sipërmarrje të tilla quhen kryesisht fondet e investimeve, shoqëritë aksionere ose shoqëritë komandite.

Detyrim është që këto struktura të njihen si të tilla, duhet të licencohen  nga Autoriteti i Mbikëqyrjes Financiare.Të gjitha sipërmarrjet e investimeve kolektive dhe nënfondet e regjistruara ose të njohura nga Autoriteti sipas këtij ligji regjistrohen në një regjistër të posaçëm.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.