Rregullat e reja të Ambasadës Gjermane: ”Njoftoni nëse keni qenë në Shqipëri 10 ditëshin e fundit para se të udhëtoni drejt Gjermanisë”
Ambasada Gjermane në Tiranë ka bërë një njoftim të rëndësishëm për të gjithë ata qytetarë që kanë qëndruar përgjatë 10 ditëve të fundit në një zonë risku si Shqipëria dhe duan të hyjnë në Gjermani.
Në lajmërim ambasada ka bërë me dije, se qytetarët e kanë të detyruar të njoftojnë për këtë fakt dhe në rast se duan të udhëtojnë drejt Gjermanisë, duhet të përcjellin të dhënat personale, vendqëndrimet, deri në 10 ditë para dhe pas hyrjes në vend, si dhe mjetin e udhëtimit që është përdorur.
Ambasada njofton se ky raportim duhet të bëhet nëpërmjet rrugëve digjitale dhe një kopje e raportimit duhet të mbahet me vete. Ky rregull i ri ka hyrë në fuqi që prej ditës së djeshme.
Njoftimi i plotë nga faqja zyrtare e Ambasadës Gjermane.
E re: Njoftim digjital në rast të hyrjes në Gjermani
Të gjithë personat, që në 10-ditëshin e fundit kanë qëndruar në një zonë risku – sipas kategorizimit të bërë ngë Instituti Robert Koch (ndër të tjerë: Shqipëria) – kanë detyrimin e njoftimit. Kjo do të thotë që në momentin e hyrjes në vend duhet të përcillen të dhënat personale, vendet e qëndrimeve deri në dhjetë ditë përpara dhe pas hyrjes në vend, si dhe mjeti i udhëtimit i përdorur për hyrjen në vend. Njoftimi zakonisht kryhet në rrugë digjitale.
Ky rregull vlen duke nisur prej ditës së diel datë 8 nëntor. Një kopje e njoftimit në rrugë digjitale apo në ndonjë mënyrë tjetër e hyrjes në vend duhet të mbahet me vete. Informacione të mëtejshme të rëndësishme si dhe mënyrën për të njoftuar e gjeni këtu: https://www.einreiseanmeldung.de.
Elefteria Zguri/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.