Rrezatimi nga antenat – AKEP: Është brenda kufijve të lejuar
Autoriteti i Komunikimeve Elektronike dhe Postare për herë të parë ka publikuar rezultatet e monitorimeve periodike për nivelin e rrezatimit nga antenat e telefonisë celulare.
Mbështetur në matjet e kryera në muajt shkurt dhe mars, rrezatimi nga antenat e telefonisë celulare është poshtë kufijve ligjorë të përcaktuar dhe nuk përbën rrezik për shëndetin e njerëzve. Matjet janë kryer në Fier, Lushnjë, Elbasan dhe Kavajë, kryesisht pranë pikave të ndjeshme, si shkolla, spitale apo institucione.
Të paktën për pikat e ndjeshme, nga matjet konstatohet se nivelet e rrezatimit të emetuara nga antenat e telefonisë celulare janë shumë më poshtë atyre të përcaktuara nga nga Komisioni Ndërkombëtar për Mbrojtjen nga Rrezatimi Jo Jonizues. Për Republikën e Shqipërisë, nivelet e referencës së ekspozimit janë përcaktuar me një rregullore të Këshillit të Ministrave, të vitit 2012.
Çështja e rrezatimit të pajisjeve celulare si një rrezik potencial për shëndetin e njerëzve është ende objekt debatesh në komunitetin mjekësor dhe shkencor. Nga raportet e monitorimit të AKEP, nuk rezulton të jenë kryer matje në ndërtesat ku janë vendosur kullat e antenave, që do të masnin ekspozimin e njerëzve që jetojnë në këto pallate apo pranë tyre. Megjithatë, nga përvoja botërore, vlerësohet se rrezatimi i antenave për njerëzit që jetojnë poshtë tyre nuk i tejkalon kufijtë e lejuar. Kjo ndodh sepse rrezatimi i antenave përhapet në drejtim horizontal, për të komunikuar me kullat e tjera të vendosura në lartës.
Në teori, rrezatimi që përhapet vertikalisht tek banorët që jetojnë poshtë antenave është i ulët. Ekspertët vlerësojnë më shumë si një rrezik potencial rrezatimin që vjen nga telefonat celularë apo nga pajisjet wi-fi, sesa atë të antenave. Që prej vitit 2011, Organizata Botërore e Shëndetësisë është shprehur se fushat elektromagnetike nga telefonat celularë mund të jenë një faktor potencial kancerogjen dhe ka këshilluar publikun që të kufizojë përdorimin e këtyre e pajisjeve, ose të marrë masa alternative, si përdorimi i kufjeve apo i mesazheve të shkruara.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.