Rreziku i investimit të bankave, në rënie me 6.7% në gjashtë muajt e parë!

Ekspozimi i sistemit bankar ndaj rrezikut ka rënë më tej gjatë gjysmës së parë të këtij viti. Sipas të dhënave nga Banka e Shqipërisë, totali i aktiveve të korrektuara me koeficientët përkatës të rrezikut, në fund të qershorit zbriti në 804 miliardë lekë, në rënie me 6.7% që nga fillimi i vitit. Ulja e vlerës së aktiveve me rrezik lidhet më së shumti me tendencën e vazhdueshme në rënie të portofolit të kredisë së sistemit bankar.

Sipas të dhënave të Bankës së Shqipërisë, që nga fillimi i vitit portofoli i kredisë së sistemit bankar është tkurrur me 20 miliardë lekë. Ponderimi i aseteve me koeficientë rreziku bëhet kryesisht në funksion të llogaritjes së mjaftueshmërisë së kapitalit të bankës. Ulja e vlerës së aktiveve me rrezik ka ndikuar në rritjen e mëtejshme të treguesit të mjaftueshmërisë së kapitalit, që në qershor arriti në 16.6%, nga 15.1% që ishte në fund të vitit 2017.

Veç të tjerash, totali i aktiveve të korrektuara me koeficientët e rrezikut është një tregues i llojit të investimeve që ndërmerr sistemi bankar. Për shembull, investimi në bono qeveritare ka koeficientë rreziku 0 dhe nuk shton asgjë në totalin e aktiveve të korrektuara për efekt të llogaritjes së mjaftueshmërisë së kapitalit. Përkundrazi, kredia ka një impakt më të lartë në totalin e aktiveve, sepse ka koeficientë ponderimi më të lartë.

Kredia në lekë ponderohet me koeficient 1, çka do të thotë se i shtohet në vlerë të plotë nominale totalit të aktiveve. Ndërsa kredia në valutë, për kredimarrës me të ardhura në lekë, ponderohet me koeficent 1.5, çka do të thotë se ndikon akoma më shumë në rritjen e totalit të korrektuar të aktiveve. Një tjetër formë investimi që ponderohet me koeficientë të lartë rreziku janë investimet jashtë vendit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.