Rreziku i Italisë me borxhin – Zhvlerësimi i kreditit në “mbeturinë” do t’i kushtojë shtrenjtë vendit

Borxhi Sovran i Italisë ndodhet në rrezik, ndërkohë që përplasja për buxhetin me Komisionin Europian po rrit interesat e borxhit në nivele rekord, pak kohë përpara se 2 agjencitë e vlerësimit të kreditit pritet të ulin vlerësimin për vendin me 1 gradë, afër nivelit  “mbeturinë”.

Moody’s dhe Standard & Poor’s, që e vlerësojnë Italinë 2 gradë sipër mbeturinës,  priten gjerësisht të ulin notën për vendin në fund të muajit Tetor, ndërkohë që Qeveria e re ka nisur një betejë me Bashkimin Europian për planet e shpenzimeve.

Duke bërë këtë, Italia do të bie poshtë gradës së investimeve për të parën herë,  gjë që mund ti  kushtojë vendit qindra miliardë dollarë në humbje të investimeve në obligacione. Shqetësimi për investitorët është mënyra se si do të çmojnë rrezikun e një borxhi sovran të Eurozonës në territor mbeturinë, duke marrë parasysh ndërlikimet e programit të blerjes së borxhit të BQE.

Sipas analistëve, vendi po tregtohet tashmë si një huamarrës mbeturinë,  ndërkohë që spread-i mes borxhit italian dhe atij gjerman arriti në 312 pikë bazë këtë javë dhe kosto e sigurimit ndaj borxhit (CDS) është rritur.

Në kulmin e krizës së Eurozonës, spread-i arriti në 550 pikë bazë dhe Italia mbante ende vlerësimin në gradë investimi.  Italia merr pjesë në shumë indekse globalë në bursë që ndjekin performancën e titujve të borxhit,  indekse që përdorin kryesisht vlerësimet e Standard & Poor’s, Moody’s dhe Fitch.

Për rrjedhojë, zhvlerësimi nga dy agjencitë e mësipërme do të mjaftonte për ta nxjerrë Italinë nga këto indekse. Nga ana tjetër, Banka Qendrore Europiane, do të kërkonte të 3 agjencitë shtuar DBRS, për të ulur vlerësimin në mbeturinë, në mënyrë që ta përjashtoi Italinë nga programi i blerjes së titujve të borxhit. Çështja do të jetë akoma më e vështirë, ndërkohë që Banka Qendrore Europiane përfundon programin e stimujve më vonë gjatë vitit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.