“Rreziku nga astrazeneca s’ekziston”, Mjekët: Tromboza në 0.0006% të të vaksinuarve dhe shkaku s’është i vërtetuar

Mjekët shqiptarë kanë sjellë disa fakte mbi vaksinën AstraZeneca, duke argumentuar se episodet e trombozave te pacientët që kanë marrë këtë vaksinë, janë jashtëzakonisht të ulëta në raport me numrin e vaksinimeve. Po ashtu, ata theksojnë se ende nuk është vërtetuar që shkak i këtyre problemeve shëndetësore të jetë pikërisht vaksina. Sipas mjekut epidemiolog Ilir Alimehmeti, 17 milionë vetë janë vaksinuar deri në mesin e muajit mars, ndërkohë që raportimet për tromboza janë vetëm disa dhjetëra dhe jo detyrimisht të vërteta. Sipas tij, kush e ka luksin për t’u vaksinuar (<1% e popullatës deri sot) dhe nuk pranon të vaksinohet, i nënshtrohet një risku shumë të madh, që është infektimit nga COVID-19. Gjithashtu, ai vë në dukje rrezikun që do të ekzistonte nëse 17 milion të vaksinuarit me AstraZeneca do të ishin infektuar me COVID-19. Ndërkaq, edhe mjeku Erjon Panajoti, teksa iu referohet të dhënave zyrtare, vë në dukje se në 5 milionë persona të vaksinuar, janë raportuar 30 raste me trombozë, për të cilat nuk është vërtetuar akoma nëse ka qenë vaksina apo diçka tjetër që ka shkaktuar trombozën. Kjo do të thotë se  vetëm 0.0006% ose 1 në 166 666 persona ka rrezik për të bërë trombozë nga kjo vaksine në rreth një muaj. Po ashtu, ai shton se normalisht 1 në 1 000 persona në një vit mund të bëjnë trombozë, ose 1 ne 12 000 persona në një muaj. “Edhe pse nuk është vërtetuar akoma nëse vaksina ka shkaktuar trombozën i bie qe ne këta 5 milionë persona te vaksinuar prej me shume se nje muaji, duhet te pësonin tromboze ne një muaj rreth 420 prej tyre”, komenton mjeku.Nisur nga këto fakte, mjeku e konsideron si inekzistent rrezikun, teksa sjell edhe të tjera shifra, sikurse është mundësia për humbjen e jetës së motociklistëve, të ciklistivë apo nga aksidentet me makinë, që janë shumë herë më të mundshme sesa vaksinimi me Astra Zeneca.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.