Rreziqet bankare të lidhura me klimën, BQE: Eurozona e ekspozuar shumë tek industritë e “pista”
Bankat e Eurozonës janë të ekspozuara ndaj industrive të karbonit dhe përballen me rreziqe të madha të lidhura me ndryshimin klimatik, e për rrjedhojë duhet të ndërtojnë kapacitet për t’i bëra ballë, sipas shefit të mbikëqyrjes të Bankës Qendrore Europiane, Andrea Enria.
Institucioni ka nisur t’i kërkojë bankave që të shpalosin publikisht të dhënat ndaj rreziqeve të lidhura me klimën dhe mjedisin, si dhe t’i përfshijnë këta faktorë në strategjitë afat-gjata të biznesit.
“Një tranzicion i shpejtë drejt një ekonomike pa karbon do të ketë një ndikim të rëndë tek sketorët e ndjeshëm ndaj klimës, duke shkaktuar humbje të mëdha në sistemin bankar deri në 60% nga skenari bazë”, tha Enria. Sipas tij, problemi qëndron se rreziqet e ndryshimit klimatik materializohen zakonisht në afat-gjatë, ndërkohë që bankat zakonisht shohin rreziqet në vitin e ardhshëm dhe kërkesat rregullatore e përforcojnë këtë qasje afat-shkurtër. Pavarësisht se BQE ka thënë se lufta e ndryshimit klimatik është një objektiv kritik, banka është përballur me kritika për blerjen e borxhit korporativ, që përfshin miliarda euro borxh nga firmat më ndotëse të rajonit.
Banka është kundërpërgjigjur duke thënë se përjashtimi i firmave nga programi i blerjes së obligacioneve bazuar tek aktiviteti i tyre është përtej fushës së politikave monetare dhe do të binte ndesh me mandatin.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.