Rreziqet ekonomike – BMI Resarch: Në Shqipëri janë të larta

Rreziqet për ekonominë shqiptare paraqiten më të larta në raport me mesataren e vendeve të rajonit. Sipas analizës së kompanisë BMI Research, pjesë agjencisë së vlerësimit Fitch Ratings, rreziqet për ekonominë shqiptare janë krahasimisht të larta, si në afatin e shkurtër, ashtu edhe në afatin e gjatë.

Indeksi i rreziqeve të BMI Research ndërtohet sipas një shkalle nga 0 deri në 100, ku sa më i ulët është vlerësimi, aq më i lartë është rreziku. Për sa i takon riskut ekonomik afatshkurtër, Shqipëria vlerësohet me indeksin 40.8, kundrejt një mesatareje rajonale prej 53.1. Shqipëria lë pas vetëm Bosnje-Hercegovinën, ndërsa edhe Kosova vlerësohet lehtësisht më mirë se Shqipëria.

Ndërsa, për rreziqet e afatgjata, pikëzimi i Shqipërisë është pak më i lartë, 48.2, por gjithnjë poshtë mesatares 53.4 së rajonit. Në fakt, raporti nuk ofron një analizë të detajuar kombëtare për Shqipërinë, ndryshe nga sa ndodh për shumicën e vendeve të tjera të rajonit. Në këto kushte, argumentet e vlerësimit nuk janë shumë të qarta. Megjithatë, mbështetur në metodologjinë e studimit dhe në analizën e vendeve të tjera, vlerësimi merr në shqyrtim treguesit kryesorë makroekonomikë e financiarë dhe projeksionet për të ardhmen.

Raporti përmban një vlerësim të veçantë edhe për sa i takon rrezikut politik, ku Shqipëria ka një vlerësim më pozitiv në raport me nivelet mesatare rajonale, si në afatin e shkurtër, ashtu edhe në afatin e gjatë. Megjithëse rreziqet politike padyshim që nuk kanë munguar në vitet e fundit, analiza e BMI vlerëson se në të ardhmen ato janë më të përmbajtura krahasuar me vende të cilat bartin problematika të ndërlikuara politike, si Bosnje-Hercegovina, Maqedonia apo Kosova.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.