Rreziqet nga i ftohti dhe ngricat – ISHP: Kujdes të moshuarit dhe të sëmurët kronikë. Këshillat sesi të ruani shëndetin

Teksa parashikimet e motit flasin për uljen e fortë të temperaturave, mjekët sjellin në vëmendje se i ftohti mund të shkaktojnë një sërë problemesh shëndetësore ose të përkeqësojë sëmundjet ekzistuese. Sipas Institutit të Shëndetit Publik, gjatë dimrit, organizmi dhe zemra punojnë më shumë për të përballuar të ftohtin, ndërsa kjo mund të jetë veçanërisht e rrezikshme për të moshuarit dhe të sëmurët kronikë e kryesisht për personat që vuajnë nga sëmundjet e zemrës.

Disa nga sëmundjet që mund të shfaqen ose përkeqësohen si pasojë e të ftohtit në dimër janë: Sëmundje të rrugëve të sipërme të frymëmarrjes, ku përfshihet skuqja apo dhimbje deri në infeksion të bajameve, veshëve apo hundës, gripi dhe viroza të ndryshme, acarim i astmës deri në infeksione të mushkërisë, dhimbje koke si pasojë e ngushtimit të enëve të gjakut në kokë, rritje e tensionit arterial dhe përkeqësim të tij tek të sëmurët kronikë, shtrëngime gjoksi deri në infarkte të zemrës. Për të parandaluar këto pasoja, Instituti i Shëndetit Publik ka dhënë disa këshilla për qytetarët.

“Qëndroni në ambiente të ngrohta dhe të ajrosura herë pas here. Vishuni ngrohtë dhe përdorni shall, doreza dhe kapuç kur jeni në ambiente të jashtme dhe të ftohta. Evitoni të dilni jashtë në orët e para të mëngjesit dhe orët e vona të darkës. Ushqehuni me ushqime të ngrohta e të lëngshme të përbëra nga mishi, bishtajoret, perimet, drithërat, por edhe fruta që përmbajnë vitamina dhe minerale. Pini sa më shumë ujë dhe lëngje, sidomos nëse jeni të sëmurë dhe qëndroni vazhdimisht në shtëpi”, këshillojnë ekspertët e ISHP-së. Sipas parashikimeve, në fillim të javës që vjen temperaturat në vendin tonë parashikohet të arrijnë në -17°C.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.