Rreziqet për ekonominë e Kosovës – Nga rritja e çmimeve të ushqimeve dhe energjisë, deri tek tkurrja e remitancave!

Sipas projeksioneve të fundit të Ministrisë së Financave, ekonomia e Kosovës gjatë vitit 2022 pritet të regjistrojë një rritje në terma realë me rreth 4.4%. Ky vlerësim përbën një rishikim më të ulët nga vlerësimet fillestare. Por, edhe kjo shifër mund të mos arrihet për shkak se ekzistojnë disa rreziqe.

Efektet e përhapjes së krizës së Ukrainës pritet të ndikojnë negativisht në ekonominë e Kosovës. Kriza e brendshme e energjisë, e shkaktuar nga rritja e theksuar e konsumit në kushtet e kapaciteteve të vjetërsuara të prodhimit të brendshëm të energjisë mundet të çojë në përsëritjen e situatës që ndodhi në fundin e vitit 2021 dhe të rrisë ndjeshëm kërkesën për import. Ky skenar do të ndikonte negativisht çmimet e prodhimit dhe rrjedhimisht të konsumit dhe do të kërkonte një mbështetje më të madhe financiare nga ana e qeverisë.

Nga ana tjetër, edhe pse marrëdhëniet tregtare me vendet e përfshira në konflikt janë të ulta, Kosova, si një vend që importon produkte ushqimore, bujqësore dhe energji, është ndjeshëm e ekspozuar nga rritja e çmimeve globale të këtyre mallrave. Tejzgjatja, apo ashpërsimi i mëtejshëm i luftës në Ukrainë mund të prekë vendet ku jetojnë emigrantët kosovarë, duke përkeqësuar situatën e tyre financiare, e cila më tej mund të reflektohet në ngadalësim të remitancave, eksportit të shërbimeve të udhëtimit, apo investimet e huaja direkte.

Një prej sfidave kryesore në të gjitha vendet pothuajse ka qenë vendimmarrja e politikës monetare në mënyrë të tillë që adreson presionet inflacioniste, por pa penguar ecurinë e rimëkëmbjes ekonomike të pritur gjatë vitit 2022 dhe në vitet pasardhëse. Pritet që gjatë vitit 2022, vendet e Eurozonës të ndërmerren masa shtrënguese të kushteve monetare (rritje e normës bazë së interesit apo ngadalësimit i programit të blerjes së aseteve ) për të adresuar rritjen e vazhdueshme të çmimeve. Këto masa do të ndikojnë negativisht në aktivitetin ekonomik të këtyre vendeve, gjë e cila potencialisht mund të përçohet edhe tek ekonomia e Kosovës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.