Rriten depozitat në lekë – Nëntori e zbeh lehtë “mbretërimin” e euros
Depozitat bankare në lekë u rritën për të tretin muaj radhazi gjatë nëntorit. Sipas të dhënave nga Banka e Shqipërisë, depozitat në monedhën vendase arritën vlerën e 460 miliardë lekëve, në rritje vjetore me rreth 1.6%.
Depozitat bankare kanë ruajtur një tendencë pozitive edhe gjatë sezonit të vjeshtës, në vijim të rritjes së zakonshme sezonale të regjistruar në muajt e verës. Sipas të dhënave nga Banka e Shqipërisë, për muajin nëntor depozitat e përfshira në treguesin e parasë së gjerë arriti në 1 një trilion e 16 miliardë lekë ose rreth 8.3 miliardë euro. Depozitat vazhdojnë të rujanë ritme rritjeje të kënaqshme, me 3.8% më shumë krahasuar me të njëjtën periudhë të një viti më parë.
Struktura e depozitave vazhdon të dominohet nga fondet në valutë dhe sidomos ato në euro. Në fund të nëntorit, depozitat në valutë përbënin rreth 55% të totalit të depozitave bankare. Megjithatë, për nëntorin kontributin në rritje e dhanë depozitat në lekë, që u zgjeruan me 2.3 miliardë lekë, ndërsa depozitat në valutë ranë me afro tre miliardë lekë. Rënia e nëntorit mund të lidhet me rënien e fluksit të prurjeve nga turizmi, pas pikut sezonal të regjistruar gjatë verës, madje edhe në pjesën e parë të vjeshtës, për shkak të motit të favorshëm.
Edhe gjatë vitit 2019 mes depozituesve po mbizotëron tendenca për t’i mbajtur fondet e tyre në formë likuide, në llogari rrjedhëse ose depozita pa afat. Ekspertët mendojnë se kjo lidhet me normat e ulëta të interesit, që nuk japin stimuj për t’i mbyllur paratë në depozita me afat. Një tendencë e tillë është normale dhe përputhet me qëllimin e politikës monetare, për të reduktuar kursimin dhe për të rritur konsumin dhe investimet, me qëllim nxitjen e kërkesës së brendshme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.