Rriten eksportet bujqësore – Më shumë kërkesë për blegtorinë dhe peshkimin, bie bujqësia
Vitit 2018 ka nisur mbarë për prodhimin vendas, pasi eksportet e produkteve bujqësore dhe blegtorale arritën në vlerën 6.3 miliard lekëve në total, duke u rritur me 22.8 %, në krahasim me të njëjtën periudhë të një viti më parë, apo 1.2 miliardë lekë më shumë.
Ndryshe nga periudhat e mëparshme kur bujqësia ka qenë gjithnjë në rritje dhe blegtoria në rënie, këtë vit duket se situata ka ndryshuar. Kontributin më të madh në rritjen e eksporteve e ka dhënë blegtoria dhe sektori i peshkimit, me rritje ka rezultuar edhe agroindustria, ndërsa bujqësia ka shënuar një rënie të lehtë.
Sipas shifrave të Ministrisë së Bujqësisë, konkretisht, bujqësia ka pësuar një ulje të lehtë prej (-3.5%) nga 1.7 miliard lekë, në 1.6 miliard lekë. Blegtoria, është realizuar në masën 259.1 milion lekë në janar-mars 2018, në 147.6 milion lekë që ishte në tremujorin e parë të 2017 ose me një rritje prej (+75.5%).
Ndërsa ka pasur një rritje të ndjeshme të eksportit të peshkut, nga 848 milion lekë në 1.2 miliard lekë në janar-Mars 2018. Agroindustria është rritur, nga 2.4 miliard lekë në 3 mujorin e parë të 2017-ës ne, në rreth 3.2 miliard lekë në periudhën janar mars 2018.
Importet e produkteve bujqësore dhe blegtorale në 3-mujorin e parë 2018 arritën vlerën 25.9 miliard lekë, duke u rritur me 4.8 %, në krahasim metë njëjtën periudhë të vitit të kaluar. Deficiti tregtar gjatë kësaj periudhë në sektorin bujqësor regjistrohet në 19.6 miliardë lekë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.