Rriten fitimet për bankat – Kreditë me probleme ulen në 15.3%
Sistemi bankar i zgjeroi më tej fitimet gjatë muajit korrik. Sipas të dhënave nga Shoqata Shqiptare e Bankave, për shtatëmujorin e këtij viti, sistemi realizoi një fitim neto në vlerën e 14 miliardë lekëve.
Fitimi është mbi tre herë më i lartë krahasuar me të njëjtën periudhë të një viti më parë. Besohet se tendenca në rënie e raportit të kredive me probleme është një nga faktorët kryesorë që po favorizon përmirësimin e rezultatit financiar të sistemit bankar.
Në muajin korrik, kreditë me probleme zbritën në 15.3% të totalit, niveli më i ulët që nga prilli i vitit 2011. Rënia e kredive me probleme ul shpenzimet e bankave për provigjione, duke kontribuar në rezultate financiare më të larta.
Rrjedhimisht, tendenca rënëse e këtij treguesi pritet të ndikojë pozitivisht përfitueshmërinë e bankave edhe në pjesën e mbetur të vitit.
Përveç uljes së provigjioneve, faktorë të tjerë që kanë kontribuar në shtimin e fitimeve të bankave janë rritja e të ardhurave nga veprimtaritë e tjera dhe sidomos nga aktiviteti i këmbimit valutor.
Gjithashtu, në rritje të lartë kanë rezultuar edhe të ardhurat e jashtëzakonshme, që i referohen kryesisht shitjes së kolateraleve nga kreditë e humbua.
Megjithëse të dhënat e fitimeve në nivel sistemi janë mjaft pozitive, duhet nënvizuar gjithmonë se fitimet e larta janë të përqendruara në pak banka të mëdha, ndërsa për pjesën e mbetur përfitueshmëria ngelet sfidë, ose është në nivele normale.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.