Rriten interesat e borxhit – Yield-i amerikan në nivelin më të lartë në 7 vite. Ndjek Europa

Shitja e titujve të borxhit,  që nisi në sesionin e djeshëm në Shtetet e Bashkuara, është përhapur në të gjithë botën. Interesat e borxheve qeveritarë në Eurozonë u rritën ndjeshëm,  ndërkohë që të dhënat pozitive për ekonominë amerikane çuan yield-et e thesarit në nivele rekord dhe rritën pritshmëritë për vazhdimin e tkurrjes monetare nga Rezerva Federale. Yield-i 10-vjeccar në SHBA regjistroi rritjen më të madhe ditore që prej ditës së zgjedhjes së Donald Trump, ndërkohë që aktiviteti i sektorit të shërbimeve u rrit në nivelin më të lartë në 21 vite gjatë Shtatorit.

Më vonë gjatë ditës, kryetari i Rezervës Federale, Jerome Powell, dha një perspektivë tejet pozitive për ekonominë amerikane. Ndërkohë që efektet e zgjerimit të ekonomisë më të madhe në botë pritet të ndikojnë gjithë botën, shumica e yieldeve në Eurozonë ndoqën Shtetet e Bashkuara. Përjashtim pati Italia, ku interesat e borxhit vazhduan rënien e ditës së mëparshme, ndërkohë që Qeveria populiste qetësoi investitorët për planin e shpenzimeve.  Guvernatori i sistemit bankar qendror në SHBA, Powell, tha se Rezerva Federale do të rrisë normat e interesit sipër objektivit neutral, ndërkohë që ekonomia ka vazhduar të fuqizohet.

Sipas analistëve, kjo do ta bëjë më të lehtë për Bankën Qendrore Europiane që të nisë rritjen e interesave për euron në vitin 2019.   Borxhi 10-vjeçar gjerman, aktivi referemc për rajonin, shënoi nivelin më të lartë në 5 muaj prej 0.55%.  Në SHBA, yield-i 10-vjeçar i Thesarit arriti nivelin më të lartë në 7 vite prej 3.23%. “Spread-i transatlantik” mes interesave të borxhit 10-vjeçar në SHBA dhe në Gjermani, preku nivelin më të lartë në 3 dekada, prej 275 pikë bazë (2.75%).

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.