Rriten pagat për 252 mijë të punësuar: 2 mijë lekë shtesë çdo muaj, 135 mijë të tjerë do të paguajnë më pak tatim
Nga 1 korriku 2022 pagat e rreth 252 mijë punonjësve do të rriten me 2 mijë lekë në muaj. Sipas të dhënave zyrtare të tatimeve, pak më shumë se 1/3 e pagamarrësve në Shqipëri paguhen me pagë minimale 30 mijë lekë, dhe do të jetë pikërisht kjo kategori që do të përfitojë nga vendimi i qeverisë për rritjen e pagës minimale kombëtare në 32 mijë lekë në muaj.
Por me këtë lëvizje, do të rriten rrjedhimisht edhe kontributet që punëdhënësit dhe punëmarrësit derdhen për llogari të sigurimeve shoqërore dhe shëndetësore, duke kontribuuar kështu edhe në shëndoshjen e skemës së pensioneve. Viti 2022 do të jetë në tërësi viti i pagave, pasi nga muaji Korrik, mbi 135 mijë të punësuar do të përfitojnë gjithashtu shtesë në pagë , e cila do të vijë si rrjedhojë e reduktimit të tatimit që paguajnë aktualisht. Përfitues do të jenë individët të cilët kanë një pagë mujore nga 30-40 mijë lekë, të cilët do të marrin mesatarisht 650 lekë më shumë në muaj. Në total llogaritët të jenë 71.500 të punësuar që trajtohen me këtë nivel pagash.
Ndërkaq, të punësuarit më paga nga 40-50 mijë lekë, do të kenë një shtesë mesatare prej 975 lekësh në muaj, për shkak të normës tatimore të përgjysmuar. Në këtë fashë përfitojnë 58 mijë individë. Ndërsa 5900 punonjës që i përkasin fashës 150 mijë- 200 mijë lekë në muaj do të kenë një shtesë mesatare prej 1916 lekë në muaj.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.