Rriten shitjet – Por më pak kontribut nga energjia e turizmi
Shitjet në ekonominë shqiptare u rritën me ritme të mira edhe në tremujorin e fundit të vitit të kaluar, por shifrat e Instat treguan një rënie të kontributit të turizmit dhe energjisë elektrike. Ashtu siç pritej, këto degë regjistruan rritje më të moderuar në tremujorin e katërt, ndërsa një kontribut në rritje dha sektori i industrisë.
Sipas të dhënave nga Instituti i Statistikave, industria rriti shitjet me 12.4% me bazë vjetore. Industria nxjerrëse iu rikthye rritjes me ritme të larta, me 23.4% më shumë. Ndërkohë, industria përpunuese, që ka një peshë specifike më të lartë në ekonomi, u rrit me 8.5%.
Për energjinë elektrike, shitjet u rritën me 5.7%, larg niveleve dyshifrore të tremujorëve të mëparshëm. Ndërkohë, në përmirësim u shfaq edhe sektori i ndërtimit, ku shitjet u rritën me 8.3% krahasuar me një vit më parë. Tendenca e shitjeve ishte pozitive edhe në sektorin e shërbimeve. Ndër degët me peshë, rritjen më të lartë e regjistroi transporti, me 20% më shumë shitje krahasuar me një vit më parë.
Ndërkohë, tregtia, dega me peshën kryesore në shërbime, shënoi një rritje më të përmbajtur, me 4.2% më shumë krahasuar me vitin e kaluar. Shitjet e biznesit janë një tregues orientues për ecurinë e prodhimit të brendshëm bruto.
Një rritje e lartë e shitjeve ka gjasa të reflektohet në ritme të kënaqshme të rritjes së prodhimit kombëtar. Të dhënat e rritjes ekonomike për tremujorin e katërt 2018 do të publikohen nga Instat në fund të këtij muaji.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.