Rritet 33% mashtrimi financiar – 1350 raste të hetuara nga prokuroria, 534 të dënuar
Rastet e mashtrimit financiar ka shënuar një rritje të vazhdueshme gjatë viteve të fundit. Vetëm për vitin 2016, prokuroria ka hetuar në total 1350 raste të kësaj vepre penale, me një rritje prej 33% krahasuar me një vit më parë.
Rritje kanë shënuar edhe dënimet e dhëna për mashtrim. Sipas prokurorisë, në vitin 2016 janë dënuar për këtë vepër 534 persona, me një rritje prej 23% krahasuar me një vit më parë, kur numri total i të dënuarve arriti 433.
Sipas Kodit Penal, në këtë vepër përfshihen skemat piramidale, manipulimi I tregut, mashtrimet me sigurimet apo falsifikimi i markave zyrtare.
Pjesa më e madhe e mashtrimeve kanë ndodhur në Tiranë, ku janë regjistruar 51% e rasteve, ndërkohë që numër të madh hetimesh kanë shënuar Durrësi, Elbasani Vlora e Shkodra.
Bie në sy se 57.9% e të pandehurve për veprën e mashtrimit janë me arsim 9 vjeçar. 34.1% e tyre janë me arsim të mesëm dhe vetëm 8% me arsim të lartë. 2% e të pandehurve rezultojnë të punësuar në sektorin publik, 18% në sektorin privat.
Pjesa dërrmuese e të pandehurve për mashtrim rezultojnë të regjistruar sit ë papunë.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.