Rritet aktiviteti i biznesit në eurozonë – “S&P Global”: Ekonomia ka treguar elasticitet befasues përballë luftës Ukrainë-Rusi

Aktiviteti i biznesit në Eurozonë u përshpejtua muajin e kaluar pasi industria dominuese e shërbimeve të bllokut përfitoi nga një lehtësim i mëtejshëm i kufizimeve të COVID-19, duke kompensuar një frenim në rritjen e prodhimit, tregoi një sondazh të mërkurën.

Indeksi përfundimtar i përbërë i menaxherëve të blerjeve i “S&P Global”, i parë si një matës i mirë i shëndetit ekonomik, u rrit në 55.8 në prill, nga 54.9 në mars, që përputhet me një vlerësim paraprak. Çdo nivel mbi 50 tregon rritje.

“Ekonomia e zonës euro ka treguar elasticitet befasues përballë luftës Ukrainë-Rusi, falë një zgjerimi të aktivitetit të sektorit të shërbimeve pasi masat e kontrollit të virusit u lehtësuan më tej gjatë prillit”, tha Chris Williamson, kryeekonomist i biznesit në “S&P Global”.

Me kthimin e jetës në normalitet pas lehtësimit të kufizimeve të COVID-19, optimizmi u përmirësua dhe nën-indeksi i pritjeve të biznesit të shërbimeve u rrit në 62.3, nga 60.8.

Por, firmat ende po përballen me kosto në rritje dhe një pjesë të kësaj barre ua kaluan konsumatorëve, kështu që indeksi i përbërë i çmimeve të prodhimit u rrit në 68.5, nga 65.7, më i larti deri tani që kur “S&P Global” filloi të përpunonte të dhënat në fund të vitit 2002.

Këto të dhëna mund të ndikojnë në vendimin e Bankës Qendrore Europiane për të shtrënguar politikën e saj monetare pasi inflacioni në Eurozonë ishte 7.5% muajin e kaluar, pothuajse katër herë më shumë se objektivi i BQE-së prej 2%.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.