Rritet industria gjermane mbi pritshmëritë, sinjalizon një ekonomi të pandalshme

Prodhimi industrial në Gjermani u rrit mbi pritshmëritë gjatë Prillit, tregojnë të dhënat e fundit që vijnë nga vendi, duke rritur ndjeshëm shpresat se ekonomia më e madhe e Evropës po zgjeron hapin e rritjes.

Prodhimi industrial u rrit me 0.8% gjatë muajit, pas një rënie të papritur gjatë Marsit, tregojnë të dhënat e ministrisë së ekonomisë gjermane. Të dhënat rezultojnë gjithashtu bindshëm mbi pritshmëritë e tregjeve dhe analistëve.

Rimëkëmbja merr shtysë nga prodhimi energjetik. Aktiviteti në sektorin e ndërtimit ndërkohë vijon ngadalësimin.

“Rimëkëmbja e ekonomisë gjermane ka hyrë në vitin e 9, dhe nuk ka asnjë shenjë që të sinjalizojë një ndalim”, thonë ekspertët.

Këto të dhëna vijnë vetëm një ditë pas atyre që tregonin një rënie të porosive në sektor gjatë Prillit.

Ekonomia gjermane u rrit me 1.9% gjatë vitit të kaluar, duke marrë shtysë nga konsumi privat dhe shpenzimet qeveritare.

I njëjti ritëm u ruajt edhe gjatë tremujorit të parë, me eksportet që kanë rifituar disi vendin e humbur në rritjen e prodhimit kombëtar.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.