Rritet inflacioni në Eurozonë – Bashkuar me të dhënat pozitive ekonomike, japin optimizëm për BQE

Inflacioni në Eurozonë është rritur sipër projeksioneve në muajin Prill dhe treguesi bazë tregoi rritjen më të madhe në një vit,  duke dhënë optimizëm për politikëbërësit e Bankës Qendrore Europiane. Indeksi i çmimit të konsumit u rrit me 1.7% në Prill me bazë vjetore, që është niveli më i lartë që prej muajit Nëntor.

Treguesi që heq komponentët e luhatur si energjia dhe ushqimi, u rrit në 1.2%, niveli më i lartë në 1 vit, nga 0.8% që ishte në Mars. Përshpejtimi i inflacionit, që është objektivi kryesor i Bankës Qendrore Europiane, vjen pak ditë pas  publikimit të Produktit të Brendshëm Bruto në Eurozonë, që tregoi rritje të papritur në tremujorin e parë. Kjo do të bëjë nevojën e stimujve monetarë më pak urgjente.

Presidenti i Bundesbank, Jens Weidmann, tha se tregu i fortë i punës dhe konsumi privat, do të nxisin ekonominë më të madhe të Europës gjatë vitit. Ai bëri gjithashtu thirre për Bankën Qendrore Europiane që të vazhdojë me normalizimin e politikave monetare. Përshpejtimi i rritjes së çmimeve mund të jetë nxitur pjesërisht nga faktorë të përkohshëm,  që mund të largohen në Maj.

Zyra e Statistikave në Gjermani raportoi më herët gjatë javës se inflacioni ishte rritur me normën më të shpejtë në 5 muaj gjatë Prillit, prej rritjes së kostove të paketave të pushimeve.   Inflacioni bazë ndodhet tashmë në një tavan që nuk e ka thyer për 2 vite, çka vë në dukje vështirësitë e Bankës Qendrore Europiane  për të arritur një rritje të qëndrueshme të çmimeve.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.