Rritet interesi për TAP – Banka e Detit të Zi e gatshme për të financuar
Banka e Detit të Zi për Tregti dhe Zhvillim është e interesuar për të financuar projektin e Korridorit Jugor të Gazit.
Këtë e konfirmoi presidenti i bankës Ihsan Ugur Delikanli gjatë një eventi në Baku të dedikuar për prezantimin e mundësive të bankës për biznes dhe sektorin bankar në Azerbajxhan.
“Shpresoj se qeveria e Azerbajxhanit dhe partnerët e tjerë do të konsiderojnë pjesëmarrjen tonë në projektin e Korridorit Jugor të Gazit dhe se një vendim pozitiv do të merret”, u shpreh Delikanli.
Ai gjithashtu u takua me Ministrin e Financave të Azerbajxhanit Samir Sharifov. Ata diskutuan për gjendjen e marrëdhënieve mes Azerbajxhanit dhe BDZTZ si edhe mundësitë e bashkëpunimit në të ardhmen.
Ata u fokusuan në reformat strukturore të implementuara nga qeveria, ndërsa Delikanli garantoi se do të vijoi bashkëpunimi për të siguruar zhvillimin ekonomik.
Banka e Detit të Zi për Tregti dhe Zhvillim u ngrit nga Shqipëria, Armenia, Azerbajxhani, Bullgaria, Gjeorgjia, Greqia, Moldavia, Rumania, Rusia, Turqia dhe Ukraina, të cilat janë edhe 11 vendet themeluese të Bashkëpunimit Ekonomik të Detit të Zi, si një shtyllë financiare e kësaj të fundit.
Kapitali i autorizuar i bankës arrin në 3,45 miliardë euro dhe deri më sot, kjo bankë ka alokuar 360 milionë euro për implementimin e 40 projekteve në Azerbajxhan.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.