Rritet kredia për shtëpi – 70 milionë euro të dhëna në pesë muaj

Në pesë muajt e parë të këtij viti, sistemi bankar ka dhënë 9.2 miliardë lekë ose afro 70 milionë euro kredi të reja për blerje të pasurive të paluajtshme nga individët. Sipas të dhënave nga Banka e Shqipërisë, kredia hipotekare është një nga segmentet më aktive të produkteve bankare.

Kredia e re për këtë qëllim rezulton në rritje me 15% krahasuar me 5- mujorin e parë të vitit të kaluar. Rritja e kredisë për pasuri të paluajtshme, kryesisht banesa, reflekton politikat agresive të bankave në këtë segment, të mundësuara sidomos nga ulja drastike e normave të interesit. Kreditë për blerje banesash janë një produkt ku bankat janë shumë të interesuara për t’u zgjeruar, siç dëshmohet edhe nga fushatat e shumta të marketingut.

Ky produkt ka mesatarisht raportin më të ulët të kredive me probleme dhe iu mundëson bankave një rritje të qëndrueshme në segmentin e individëve, për të ulur përqendrimet e larta të portofoleve që shumica e bankave kanë në subjektet biznese. Normat e ulëta të interesit dhe çlirimi i ofertës po josh më shumë familje të blejnë një shtëpi të tyren, duke i dhënë një shtysë edhe tregut të pasurive të paluajtshme.

Veçanërisht në zonat periferike të Tiranës, çmimet janë korrektuar gjatë viteve të fundit, kur tregu i pronave ndjeu pasojat e krizës. Ndërthurja e çmimeve më të ulëta me kushtet e favorshme të financimit kanë sjellë një gjallërim në tregun e banesave gjatë vitit 2016, tendencë që pritet të vijojë edhe këtë vit.

Sipas ekspertëve, blerja e një pasurie të paluajtshme tani mund të jetë një investim shumë i leverdishëm, jo vetëm për shkak të interesave të ulët të kredisë, por edhe pritshmërive për një rritje të çmimeve gjatë viteve në vijim.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.