Rritet me 17% aksesi në rrjetet fikse – Gjatë vitit 2020, shqiptarët më pak internet në celular, më shumë në kompjutera

Ndërsa si telefonia celulare ashtu edhe ajo fikse kanë shënuar tkurrje gjatë vitit 2020, aksesi në internet përmes rrjete fikse është ndër të vetmit tregues me rritje të tregut të komunikimeve elektronike. Në raportin e sapopublikuar për tremujorin e tretë të vitit 2020, AKEP 2. Bën me dije se numri i pajtimtarëve më akses Broadband në internet nga rrjete fikse në T3 2020 arriti në rreth 480 mijë, që përbën një rritje me 1.6% në krahasim me tremujorin e mëparshëm dhe një rritje me rreth 17.3% në krahasim me të njëjtin tremujor në vitin 2019.

Ndërkaq, numri i pajtimtarëve të linjave të telefonisë fikse në fund të tremujorit të tretë 2020 ishte rreth 230 mijë, që përbën një rënie me 2.49% në krahasim me T2 2020 dhe një rënie me 6.2% në krahasim me T3 2019. AKEP ka kryer vlerësimin e këtij treguesi për periudhat para T4 2016 për shkak të ndryshimit të përkufizimit të tij në këtë tremujor.

Rritje ka shënuar edhe numri i familjeve që janë abonuar në paketat e integruara të shërbimeve, ku përfshihen telefonia, internet e paketat televizive.

Numri i pajtimtarëve të rrjeteve fikse që kanë akses në shërbime të integruara (Telefoni/Internet/TV) në fund të 3 mujorit të tretë 2020 arriti në rreth 277 mijë, një rënie kjo me 1.4% në krahasim me T2 2020 dhe rritje me 7.1% krahasuar me T3 2019.

Numri i pajtimtarëve me paketa trefishe (Telefoni, Internet dhe TV) përbën 38.2% të totalit të pajtimtarëve me paketa të integruara ndërsa 32.4% janë me paketa “Internet dhe Telefoni” dhe 29.4% me paketa “Internet dhe TV”.

58% e pajtimtarëve me akses broadband në rrjete fikse në fund të T3 2020 ishin pajtimtarë me paketa të integruara (Telefoni/Internet/TV), ku 22% janë me paketa trefishe (Telefoni, Internet dhe TV).

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.