Rritet me 26,9% numri i të huajve që vizituan Shqipërinë – Gjatë gushtit, kryesojnë shtetasit gjermanë
Numri i shtetasve të huaj që kanë hyrë ne territorin shqiptar gjatë muaj Gusht është rritur me 26,9 për qind krahasuar me të njëjtën periudhë të një viti më parë.
E parë kjo shifër në 8 muaj, janar-gusht, sipas të dhënave të Instat, numri i të huajve është rritur me 16,8 për qind. Ose e thënë ndryshe Shqipërinë e kanë vizituar në tetëmujorin e 2018 4.397.638 të huaj.
Gjermani është vendi që ka patur hyrjet më të larta të shtetasve në Shqipëri, një rritje kjo me 82,5 për qind, ndërsa uljen më të madhe e kanë patur shtetasit nga Mali i Zi me 63,5për qind.
Në tetëmujorin e 2018, ndër vendet që kanë hyrjet më të larta të shtetasve në Shqipëri, Gjermania ka patur rritjen më të madhe 36,9 %.
Sipas Instat, vetëm 12,3 për qind e shtetasve të huaj kanë ardhur në Shqipëri për pushime. Ndërsa pjesa më e madhe e të huajve kanë kryer vetëm vizita ditore në vendin tonë. Gjatë muajit Gusht, vihet re një rritje të të huajve për qëllime biznesi apo qëllime fetare.
Nga ana tjetër, një rritje të lehtë kanë pësuar edhe numri i shtetasve shqiptarë të dalë nga territori i Shqipërisë, gjatë muajit Gusht 2018, është 688.559 krahasuar me Gusht 2017, ky numër është rritur 1,3 %. Numri i shtetasve shqiptarë të dalë nga territori i vendit tonë në tetëmujorin 2018, është 3.550.502, duke u rritur 3,2 %, krahasuar me të njëjtën periudhë të një viti më parë.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.