Rritet optimizmi në sektorin bankar – BEI: Bankat mëmë në Shqipëri, më të kënaqura se më parë
Banka Europiane e Investimeve, që është organi zyrtar huadhënies i Bashkimit Europian, ka publikuar një sërë raportesh për tregun bankar në Europën qendrore dhe juglindore, ku në analizë merret edhe vendi ynë.
Raporti që i referohet kreditimit të sektorit në tërësi gjatë gjysmës së parë të këtij viti jep një panoramë të gjerë për tregun bankar në vendin tonë. “Bankat raportojnë një rritje të kërkesës për kredi ndërkohë që kushtet e ofertës janë rikthyer sërish në territor neutral. Normat e kredive jo-performuese kanë vijuar të përmirësohen, por pavarësisht kësaj mbeten ndër më të lartat në rajon. Shumica e bankave raportojnë fitime më të ulta se të ngjashmet e tyre në Europë”-thuhet në krye të profilit për Shqipërinë.
Vlerësimi vijon duke thënë se pjesa dërrmuese e bankave mëmë e konsiderojnë Shqipërinë si një treg me një potencial mesatar, ndërkohë që shumica e tyre e vlerësojnë pozicionin e tyre në Shqipëri si të kënaqshëm. Duke krahasuar raportin e sapo publikuar me atë të kaluar, i publikuar në nëntor të 2018-ës, vihet re një rritje e ndjeshme e normës së atyre që shprehen të kënaqur me pozicionin e tyre në Shqipëri, si dhe një rënie e ndjeshme e normës së atyre që mendojnë se potenciali i tregut bankar në Shqipëri është i ulët. Pjesa dërrmuese, 75% mendojnë se potenciali ëhstë mestar. Gjashtë muaj më parë, kjo normë fiksohej në 71%.
Në harkun e 6 muajve, optimizmi, sidomos ai i drejtuesve të bankave mëmë që operojnë në Shqipëri është rritur ndjeshëm. Kjo mund të ketë ardhur edhe si pasojë e konsolidimit të mëtejshëm të tregut bankar në vendin tonë. Kërkesa për kredi në Shqipëri është përmirësuar gradualisht dhe bankat presin që kërkesa për hua të vazhdojë ritmin pozitiv, thuhet më tej mes rreshtave në raport.
Sa i përket kushteve për kreditimit, ato vlerësohen të jenë lehtësuar për kredi konsumatore, ndërkohë që janë ngushtuar për kreditë koorporative. Publikimi i raportit vjen në kuadër të “Iniciativës së Vjenës”.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.