Rritet paga mesatare mujore – Më shumë paguhen punonjësit në aktivitetet financiare, por edhe ligjvënësit
Ndonëse viti 2020 u karakterizua nga pandemia e COVID-19 dhe një pjesë e konsiderueshme e kanë punuar online, të dhënat më të fundit nga INSTAT tregojnë se paga mesatare mujore ka pësuar rritje. Kështu, për tremujorin e fundit të këtij viti paga mesatare mujore bruto për një të punësuar me pagë arriti në 54.951 lekë, duke u rritur me 2,8 %, krahasuar me të njëjtin tremujor të vitit 2019. Referuar këtyre të dhënave paga mesatare mujore bruto për një të punësuar me pagë në sektorin e aktiviteteve financiare dhe të sigurimit është 2,1 herë më e lartë sesa mesatarja në nivel kombëtar, ndërsa në grup-aktivitetin e Bujqësi, pyje dhe peshkim është 40,9 % më e ulët.
Krahasuar me të njëjtin tremujor të vitit të kaluar, gjatë tremujorit të katërt 2020 paga mesatare bruto për grup-aktivitetin e Administratës publike dhe mbrojtjes; sigurimi social i detyrueshëm; arsimi; shëndetësia dhe aktivitete të punës sociale, ka rritjen më të madhe prej 4,5 %, ndërsa në grup-aktivitetin Bujqësia, pyjet dhe peshkimi është ulur me 7,5 %.
Ndërkohë, paga mesatare mujore bruto, për një të punësuar në grup-profesionin e ligjvënësve, nëpunësve të lartë të administratës shtetërore dhe drejtorëve ekzekutivë është 80,6 % më e lartë sesa mesatarja në nivel kombëtar, ndërsa në grupin e Punëtorëve, ku përfshihen profesionet elementare, është 40,9 % më e ulët. Paga për grup-profesionin e Nëpunësve ka rritjen më të madhe prej 5,1 % gjatë tremujorit të katërt 2020, krahasuar me të njëjtin tremujor të vitit të kaluar, ndërsa për grup-profesionin e Punonjësve të kualifikuar të bujqësisë, pyjeve dhe peshkimit është ulur me 0,9 %.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.