Rritet papunësia në Francë -Socialistët në hall, “kurorëzojnë” dështimin
Telashet për të majtët në Francë duket se nuk kanë të sosur. Ministria e punës në vend raporton një rritje të lehtë të normës së papunësisë gjatë muajit Janar, çka konfirmon dështimin e Francois Hollande dhe të majtëve në pushtet.
Këto të dhëna i japin edhe më shumë zë idesë se, Le Pen mund të jetë presidentja e re franceze. Numri i personave të papunë u rrit ne 3.468 mijë gjatë janarit, ndërkohë që papunësia mbetet ende pranë 10%.
Hollande kishte premtuar një normë papunësie nën 10%, duke deklaruar ndër të tjera se, do të rikandidonte vetëm në rast se kjo do të arrihej. Pavarësisht se tregu i punës në vend është rimëkëmbur lehtë gjatë muajve të fundit, frenimi gjatë muajit të parë të vitit, jep sinjale shqetësuese.
Gjithsesi, të dhëna të tjera, tregojnë se, besimi konsumator gjatë Shkurtit ka prekur nivelin më të lartë në 9 vite, për të dytin muaj me radhë. Sondazhet tregojnë se, socialistët e kanë të pamundur të fitojnë sërish zgjedhjet. Madje ata projektohet të mos kalojnë dot as në raundin e dytë të zgjedhjeve, ku do të vendoset edhe presidenti ose presidentja e ardhshme e Francës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.