Rritet punësimi në Britani – Norma qëndron në 4.2% gjatë tremujorit të parë, pagat tregojnë rritje modeste

Punëdhënësit britanikë kanë punësuar më shumë staf se sa pritej në fillim të 2018-ës dhe rritja e pagave është përshpejtuar, të dhëna që do të shqyrtohen nga Banka e Anglisë përpara se të rrisë normat e interesit.

Punësimi u rrit me 197,000 në tremujorin e parë, që është rritja më e madhe në 3 vite dhe sipër projeksioneve të analistëve.

Paundi britanik dhe interesat e borxhit qeveritar patën lëvizje të lehtë pas publikimit të të dhënave. Norma e papunësisë qëndroi në 4.2% që është niveli më i ulët në disa dekada.

Rritja vjetore e pagave, përjashtuar bonuset, arriti në 2.9% në tremujorin e parë, pas rritjes me 2.8% në periudhën tremujore që përfundoi në Shkurt, raporton zyra e Statistikave në Londër.

Ndërkohë që kjo ishte rritja më e madhe që prej Gushtit 2015, duke u përshtatur me inflacionin, arriti në vetëm 0.4%. Duke përfshirë bonuset, rritja totale e pagave u ngadalësua në 2.6%, nga 2.8% që ishte në Shkurt.

Javën e kaluar, Banka e Anglisë mbajti normën bazë të interesit të pandryshuar, pavarësisht komunikimit për tkurrjen monetare më herët gjatë vitit.

Në Maj, institucioni paralajmëroi se pret sigurimin që ekonomia po rimëkëmbet, pas rezultatit të dobët në tremujorin e parë.

Në të dhënat mbi produktivitetin, zyra e Statistikave bëri të ditur se prodhimi për orë ra me 0.5% në tremujorin e parë, që është rënia më e madhe në 3 vite.

Në më pak se një vit përpara se Britania të dalë nga Bashkimi Europian, zyra e Statistikave deklaroi se numri i shtetasve europian të punësuar në Britani, ra me 1.2% në 2.292 milionë, që është rënia më e madhe në përqindje në më shumë se 8 vite.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.