Rritet punësimi në SHBA – Norma e papunësisë bie në 4.1%, largohen shqetësimet e uraganeve

Rritja e punësimit në SHBA është përshpejtuar gjatë Tetorit, pas tkurrjes në Shtator si pasojë e uraganeve. Numri i të punësuarve gjatë muajit arriti në 261 mijë, raporton Departamenti i Punës. Kjo shifër ishte më e larta që prej Korrikut 2016, megjithatë rezultoi poshtë vlerësimeve të analistëve prej 310 mijë.

Norma e papunësisë ra në 4.1% që është niveli më i ulët në 17 vite.  Të dhënat nuk kanë gjasa të ndryshojnë pritshmëritë për ndërhyrjen e Rezervës Federale në muajin Dhjetor.

Tkurrja e punësimit për Shtatorin erdhi prej uraganeve Harvey dhe Irma, që shkatërruan pjesë të Floridës dhe Teksasit në fillim të muajit. Përshpejtimi në Tetor përforcon vlerësimet e sistemit bankar qendror se tregu i punës është fuqizuar dhe aktiviteti ekonomik është përmirësuar pavarësisht ndërprerjeve në lidhje me uraganet.

Rezerva Federale e mbajti normën bazë të interesit të pandryshuar këtë javë dhe tregjet financiare presin një rritje për muajin Dhjetor, që do të ishte ndërhyrja e tretë e bankës për këtë vit.  Rritja e pagave është ngadalësuar gjatë muajit, në një normë vjetore prej 2.4%, që është edhe më e ulët që prej Shkurtit 2016.

Ekonomia u rrit me një normë vjetore prej 3% për tremujorin e tretë,  duke vazhduar performancën e fortë të vitit, pavarësisht vështirësive të presidentit dhe kongresit republikan për të zbatuar programin e tyre ekonomik.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.