Rritet rezerva e gazit në Gjermani! Me 25% më shumë për sezonin dimëror 2022/23

Rregullatori i energjisë në Gjermani ka kërkuar më shumë kapacitete për të qenë gati në dimrin e ardhshëm për të mbrojtur konsumatorët nga një rënie e mundshme e furnizimeve me gaz nga Rusia dhe rrjetet ende të pamjaftueshme të transportit. Agjencia Federale e Rrjetit tha se rriti sasinë e kapacitetit të nevojshëm të energjisë në rezervë për sezonin dimëror 2022/23 me më shumë se 25% në 7,112 megavat (MW) krahasuar me 2021/22.

Në 2021/22, autoriteti kishte ulur kapacitetin e planifikuar të rezervës së energjisë në 5,670 megavat (MW), nga 6,596 MW një vit më parë pasi më shumë impiante të gazit u kthyen në rrjet.

Në dimrin e ardhshëm, tregjet globale të gazit dhe rreziqet shtesë të ndërprerjes së eksporteve të gazit rus në Europë pas pushtimit të Ukrainës paraqesin sfida të mëtejshme. Ritmi i ngadaltë i zgjerimit të rrjetit po pengon shpërndarjen e energjisë së erës nga veriu dhe nga instalimet në det të hapur drejt jugut industrial.

Agjencia e rrjetit përmendi gjithashtu mbylljen e vazhdueshme të termocentraleve të vjetra me qymyr. Institucioni do të nisë bisedimet me operatorët e termocentraleve jashtë vendit për të provuar të sigurojë deri në 1,424 MW kapacitet shtesë, nëse nevojitet.

Për një periudhë afatgjatë, rregullatori tha se rezerva e kërkuar do të ishte 5,361 MW në dimrin 2023/2024, kur supozon se do të ketë rrjete të reja.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.