Rritet shpejt paundi – Britania mund të kthejë mbrapsht Brexit pa kërkuar lejen e BE

Këshilluesi ligjor i gjykatës së lartë të Bashkimit Europian, bëri të ditur këtë javë se Mbretëria e Bashkuar mund të anulojë Brexit pa kërkuar lejen e vendeve të tjera anëtare. Paundi u rrit shpejtë pas lajmërimit, duke prekur 1.2806 kundër dollarit amerikan, nga 1.27 që qëndronte.

Një grup politikanësh skocezë kanë kërkuar për mënyra se si mund të kthehet mbrapsht kërkesa e Mbretërisë së Bashkuar përpara afatit të Brexit në datën 29 Mars të 2019-ës. Neni 50 i traktatit të BE lejon një vend që të aktivizojë procesin e daljes nga unioni politik dhe ekonomik i Europës. Theresa May e aktivizoi këtë klauzolë të daljes në Mars 2017.

Çështja është paraqitur nga një grup ndërpartiak i politikanëve skocezë, së bashku me avokatin me profil të lartë, Jolyon Maugham. Vendimi përfundimtar për të zbuluar nëse Neni 50 mund të anulohet pa ndërhyrje nga 27 vendet e Bashkimit Europian, do të jepet nga Gjyakta Europiane e Drejtësisë.

Gjykata europiane e ka zhvilluar seancën, duke pranuar prova nga grupi i politikanëve që kërkojnë qartësi për të mbështetur vendimet e bëra nga parlamenti britanik. Qeveria britanike e ka kundërshtuar rastin, duke argumentuar se është e motivuar politikisht për të penguar negociatat e Brexit. Në gjykatë kanë qenë të pranishëm gjithashtu jurist që përfaqësonin Komisionin dhe Këshillin Europian.

Ata argumentuan se revokimi i Nenit të 50 duhet të kërkojë marrëveshje unanime nga 27 vendet e tjera të Bashkimit Europian. Europa shqetësohet se nëse lejon një vend që të aktivizojë daljen e më pas ta kthejë mbrapsht vendimin, mund të krijojë një mjet për vendet që janë të pakënaqura nga politikat e Brukselit. Opinioni i Avokatit të Përgjithshëm, Manuel Campos Sahxhez Bordon është lëshuar ditën e Martë, por vendimi i plotë do të ndjekë pas disa ditësh.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.