Rritja e 4-t më e madhe e çmimeve në Europë – Indeksi i harmonizuar i çmimeve të konsumit në Shqipëri gjatë tetorit, në 2.9%

Shqipëria vijon të jetë ndër vendet e para në Europë sa i përket rritjes së çmimeve. Indeksi i harmonizuar i çmimeve të konsumit për tetorin tregon se vendi ynë është i katërti në Europë, me një normë pranë 2.9%. Rritja më e madhe e çmimeve prej 6,6% vërehet në grupin “Ushqime dhe pije joalkoolike”, pasuar nga grupet “Transporti” me 3,4%,“Pije alkoolike dhe duhan”  me  1,5%,“Mallra  dhe  shërbime  të ndryshme” me 1,1%,  “Mobilim,  pajisje  shtëpie  dhe mirëmbajtje” me 0,6%, “Hotele, kafene dhe restorante” me 0,5 %,“Komunikimi” me 0,4 %,“Qira, ujë, lëndë djegëse dhe energji” me 0,3%dhe“Argëtim  dhe  kulturë” me 0,1%.

Nga  ana  tjetër çmimet e grupit “Veshje dhe këpucë” u ulën me 0,7%, pasuar nga grupet “Shëndeti” dhe “Shërbimi arsimor” me 0,1 % secili. Në muajin Tetor 2020, ndryshimi mujor i matur nga Indeksi i Harmonizuar i Çmimeve të Konsumit është 0,3%. Rritje më të madhe të çmimeve se vendi ynë gjatë tetorit në Europë raportojnë vetëm: Polonia, Hungaria dhe Cekia.

Një muaj më parë ky indeks fiksohej në 2.3%, dhe Shqipëria ishte po në vendin e katërt, gjithashtu pas këtyre tre vendeve. Indeksi i harmonizuar i çmimeve të konsumit shërben për të krahasuar ndryshimin e çmimeve të shitjeve me pakicë mes vendeve europiane, për të kuptuar se ku po rriten me ritme më të shpejta çmimet për konsumatorët familjarë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.