Rritja e çmimit të gazit në Europë dhe Britani faj i Gjermanisë?!

Çmimet e gazit me shumicë në Mbretërinë e Bashkuar dhe BE janë rritur me 17% pasi rregullatori gjerman i energjisë pezulloi miratimin e tubacionit të diskutueshëm të gazit natyror  Nord  Stream 2 nga Rusia në Gjermani. Ai tha se kompania operuese e tubacionit duhej të ishte në përputhje me ligjin gjerman përpara se të certifikonte projektin prej 10 miliardë eurosh (8.4 miliardë £).

Kritikët kanë frikë se tubacioni do të rrisë varësinë energjetike të Europës nga Rusia. Tubacioni përfundoi në shtator, por ishte i rrethuar nga vonesa.

Duke ecur nën Detin Baltik, Nord Stream 2 do të dyfishojë eksportet e gazit të Moskës në Gjermani, por do të anashkalojë gjithashtu Ukrainën, e cila mbështetet në tubacionet ekzistuese për të ardhura dhe do të goditet rëndë nga humbja e tarifave të tranzitit.  Bizneset gjermane kanë investuar shumë në tubacionin 1,225 km (760 milje) dhe ish-kancelari Gerhard Schröder ka luajtur një rol të madh në zhvillimin e tij.

Çmimet e gazit ishin tashmë të larta përpara këtij pengimi të fundit për projektin. Një dimër i ftohtë në Europë vitin e kaluar bëri presion të mëtejshëm mbi furnizimet dhe, si rezultat, nivelet e gazit të depozituar janë  akoma shumë më të ulëta se normalja.

Rregullatori gjerman tha se “do të ishte e mundur të certifikohej një operator i gazsjellësit Nord Stream 2 vetëm nëse ai operator do të organizohej në një formë ligjore sipas ligjit gjerman”. Vendimi ka të ngjarë ta shtyjë projektin disa muaj prapa dhe madje edhe kur të marrë miratimin gjerman, do të kërkojë një dritë jeshile nga Komisioni Evropian. (BBC)

G . D / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.