Rritja e çmimit të karburantit në vendin prodhues të naftës shkakton dorëheqjen e qeverisë!

Presidenti i Kazakistanit Kassym-Jomart Tokayev pranoi dorëheqjen e qeverisë të mërkurën pasi një rritje e çmimit të karburantit në vendin prodhues të naftës së Azisë Qendrore shkaktoi protesta në të cilat u plagosën rreth 100 policë.

Përplasjet rifilluan të mërkurën pasi kabineti dha dorëheqjen. Një korrespodent i Reuters pa mijëra protestues që po ecnin përpara drejt qendrës së qytetit Almaty, disa prej tyre në një kamion të madh, pasi forcat e sigurisë nuk arritën t’i shpërndanin me gaz lotsjellës dhe granata.

Kazakistani është një vend i kontrolluar fort i cili kultivon një imazh të stabilitetit politik, duke e ndihmuar atë të tërheqë qindra miliarda dollarë investime të huaja në industrinë e tij të naftës dhe metaleve gjatë tre dekadave të pavarësisë.

Autoritetet e qytetit u kërkuan banorëve të qëndrojnë në shtëpi, duke thënë se operacioni i zbatimit të ligjit po vazhdon. Protestat filluan pasi qeveria hoqi kontrollet e çmimeve të gazit të lëngshëm të naftës në fillim të vitit. Shumë qytetarë i kanë konvertuar makinat e tyre për të funksionuar me LPG për shkak të kostos së tij të ulët.

Duke folur me anëtarët në detyrë të kabinetit, Tokayev i urdhëroi ata dhe guvernatorët e provincave të rivendosin kontrollet e çmimeve të LPG-së dhe t’i zgjerojnë ato në benzinë, naftë dhe mallra të tjera të konsumit “të rëndësishme shoqërore”.

Ai urdhëroi gjithashtu qeverinë të zhvillojë një ligj për falimentimin personal dhe të konsiderojë ngrirjen e çmimeve të shërbimeve dhe subvencionimin e pagesave të qirasë për familjet e varfra.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.