Rritja e çmimit të naftës, që nga tetori – Çmimet në tregjet e huaja u reflektuan menjëherë
Çmimi i naftës ka pësuar rritje gjatë ditëve të fundit, teksa në enjten në tregjet me pakicë, një litër varionte nga 190-195 lekë/litër, duke shënuar një rritje të ndjeshme në raport me disa muaj më parë. Tendenca e rritjes së çmimit ka nisur para disa muajsh, duke qenë se deri në muajin shtator, një litër kushtonte rreth 170 lekë, në tetor shkoi në 177 lekë/litër, ndërsa në nëntor- dhjetor në rreth 185 lekë/litër. Një ditë më parë, ministrja e Financave dhe Ekonomisë, Delina Ibrahimaj tha se kjo rritje çmimi është ndikuar nga çmimet në tregjet ndërkombëtare dhe se qeveria nuk mund të ndikonte lëvizjet e tregut .
Këto çmime kanë shënuar një trend rritës prej muajit nëntor të vitit të kaluar, duke arritur nivelin më të lartë në 7 vite, në fund të muajit janar. Megjithatë, ajo që vihet re në tregun shqiptar është fakti se rritja në tregjet ndërkombëtare reflektohet menjëherë në vendin tone. Paralelisht, qytetarët shqiptarë, paguajnë një sërë taksash, që janë pjesë e çmimit të naftës. Kështu, për 1 litër naftë paguhet 27 lekë/litër taksë qarkullimi, 3 lekë/litër, taksë karboni, 37 lekë/litër akcizë dhe 7-10 lekë/litër taksë rilicencimi.
Po ashtu, pjesë e çmimit final janë edhe dy taksa për koncesionin e markimit të karburanteve dhe skanimit, me respektivisht 1 dhe 1.4 lekë/litër. Në total, këto taksa shkojnë në rreth 77.5 lekë/litër. Ndërkohë që, çmimit final i shtohet edhe 20%Tatimi mbi Vlerën e Shtuar, që nëse e përllogarisim me çmimin e ditëve të fundit arrin në rreth 38.6 lekë për litër. Praktikisht, në 1 litër karburant, janë rreth 116 lekë taksa. Ndërkaq, një ditë më parë, Ibrahimaj deklaroi se qeveria shqiptare nuk parashikon të ndërhyjë në politikat fiskale, çka nënkupton se këto taksa do të vijojnë të mbeten në fuqi.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.