Rritja e çmimit të ujit – ERRU: Shqyrtimi i kërkesës, në fund të gushtit

Kërkesa për rritjen e tarifave të ujit në Tiranë do të nisë të shqyrtohet në fund të muajit gusht. Lajmi bëhet me dije nga Enti Rregullator i Ujit, i cili shton se procesi i vlerësimit për dosjen e plotë të propozimit, së bashku me detajet e tjera shtesë që do të kërkohen nga Komisioni Kombëtar Rregullator, do të kërkojë minimalisht 1 muaj kohë nga data e fillimit të shqyrtimit.

Të mërkurën Këshilli Bashkiak i Tiranës miratoi propozimin për rritjen e tarifave të ujit, ndërkohë që është ERRU, që do të marrë vendimin përfundimtar.

Sipas propozimit të bashkisë, tarifa e ujit të pijshëm për abonentët  familjarë pritet të rritet me 20 lekë, duke shkuar në 65 lekë/m3 nga 45 lekë/m3 që është aktualisht. Ndërkohë që, për entet private kjo tarifë pritet të rritet në 190 lekë/m3 nga 135 lekë/m3 që është deri më tani.

Bashkia ka argumentuar rritjen e tarifës me nevojën për investime në rrjetin e transmetimit dhe të shpërndarjes, të cilat nuk mund të sigurohen me tarifat aktuale.

Sipas relacionin që shoqëronte vendimin në këshill,  investimet e parashikuara për pesë vitet e planit të biznesit klasifikohen në dy grupe kryesore.

Grupi i parë përfshin investime kapitale nga fondet e Shoqërisë që arrijnë në total 7.3 miliardë lekë, ndërsa grupi i dytë përfshin investimet kapitale nga huaja tregtare që arrin në total rreth 16.26 miliardë lekë.

Disa nga projektet më të rëndësishme që priten të realizohen përmes këtyre investimeve janë matësat e rinj mekanikë dhe SMART për entet private, shtimi i impiantit të Bovillës dhe ndërtimi i Linjës së re të Transmisionit nga Bovilla deri në Yzberisht.

Gjithashtu, parashikohet rikualifikim i linjave të transmetimit të Shën Mërisë, ndërtimi i By-Paseve të linjave të transmisionit të Impiantit të Bovillës, Burimit të Shën Mërisë dhe Burimit të Selitës si dhe shfrytëzimi i vendburimit të Gurit të Bardhë.

Nga ana tjetër, kryebashkiaku Erion Veliaj ka premtuar furnizimin 24 orë me ujë të pijshëm, deri në vitin 2021.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.