Rritja e çmimit të ujit në Tiranë – Kategoritë që do kompensohen, nevojitet VKM
Propozimi i Këshillit Bashkiak të Tiranës për rritjen e tarifave të ujit parashikon përjashtimin nga kjo masë për një sërë kategorish individësh dhe subjektesh, por kjo do të kërkojë një vendimmarrje nga ana e qeverisë në mënyrë që të aplikohet.
Sipas propozimit të bashkisë, nga rritja do të përfitojnë kompensim të papunët, personat që trajtohen me ndihmë ekonomike, personat me aftësi të kufizuar, të verbrit dhe paraplegjikët. Gjithashtu, rritje të tarifës së ujit nuk do të ketë edhe për personat që kanë pagë nën 35 mijë lekë , kryefamiljarët që s’kanë asnjë të punësuar në familje si dhe gratë e veja.
Ndërkohë që, nga kategoria e biznesit është parashikuar që rritja të mos reflektohet për furrat e bukës. Por, sipas legjislacionit në fuqi kompensimi duhet të vendoset vetëm përmes një Vendimi të Këshillit të Ministrave, pas propozimit që duhet të kryhet nga ministritë e linjës, që në këtë rast janë Ministria e Mirëqenies Sociale dhe Rinisë dhe ajo e Financave.
Një rast i tillë u aplikua në vitin 2015, kur u parashikua heqja e fashës mbrojtëse së konsumit të energjisë elektrike deri në 300 kwh në muaj. Sipas këtij vendimi, u parashikua që për një sërë kategorish në nevojë, përfshirë edhe pensionistët, të bëhej kompensimi, në masën e 648 lekësh në muaj. Ndërkohë që, përfituesit përcaktohen nga institucionet përkatëse në të cilat ata marrin pagën, pensionin dhe përfitimet e tjera.
Aktualisht, Bashkia e Tiranës i ka propozuar Entit Rregullator të Ujit rritjen e çmimit të ujit nga 45 lekë/m3, në 65 lekë/ m3, ndërsa për entet private tarifa pritet të shkojë në 190 lekë nga 135 lekë/ m3 që është aktualisht. Vetë ERRU ka njoftuar se propozimi do të shqyrtohet në fund të muajit gusht, ndërsa ky proces do të kërkojë 1 muaj kohë.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.