Rritja e infektimeve/ Kosova rikthen karantinën në disa qytete dhe bën të detyrueshme mbajtjen e maskave
Qeveria e Kosovës ka filluar marrjen e një sërë masash detyruese për të luftuar COVID-19 pas rritjes në mënyrë alarmante të numrit të infektimeve në javët e fundit.
Rastet e reja në Kosovë po arrijnë rekorde të reja çdo ditë, gjë e cila ka shqetësuar autoritetet, ku qeveria e Avdullah Hotit ka bërë thirrje edhe për shpalljen e gjendjes së jashtëzakonshme.
Ndërkohë, në mbledhjen e fundit qeveria mori vendimin e saj për ta bërë të detyrueshme mbajtjen e maskës në ambiente publike si dhe të mbajnë distancë fizike prej 2m në ambiente të përbashkëta jashtë shtëpive/banesave të tyre.
“Vendimi obligon gjithashtu që të gjitha institucionet publike dhe private të mbajnë dezinfektues për duar dhe maska për fytyrë në vende të qasshme, në hyrje të objektit, të cilat mund të shfrytëzohen nga punëtorët e institucioneve dhe vizitorët”, thuhet në vendimin e Qeverisë.
Ditë më parë, qeveria ka vendosur masën e kufizimit për qytetarët prej orës 21:00 deri në orën 05:00 në mëngjes për Prishtinën, Prizrenin, Ferizajn e Vushtrrinë si dhe më pas edhe për komunat në veri, ndërsa listës së qyteteve që futen në karantinë nga ora 21:00 deri në orën 5:00 u janë shtuar edhe Mitrovica e Jugut, Gjilani, Fushë-Kosova dhe Shtërpca.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.