Rritja e kredisë – Shqipëria, nivele të ngjashme me Rajonin e EQJL

Rritja e kreditimit në Shqipëri është në nivele të krahasueshme me mesataren e Europës Qendrore dhe Juglindore. Sipas një analize krahasuese të Bankës së Shqipërisë, për dymujorin tetor-nëntor 2016, kreditimi në këtë rajon u rrit 3.6% me bazë vjetore, nivel ky lehtësisht më i lartë se rritja prej 3.2% e regjistruar për të njëjtën periudhë në sistemin bankar shqiptar.

Jo vetëm ritmet e kreditimit, por edhe problematikat që e kufizojnë atë ngelen përgjithësisht të ngjashme mes vendeve. Ashtu si në Shqipëri, në të gjithë rajonin e gjerë të Europës Qendrore dhe Juglindore, ka një perceptim për rritje të kërkesës për kredi, falë përmirësimeve në gjendjen e ekonomisë reale.

Megjithatë, oferta e bankave ngelet ende e shtrënguar. Në Shqipëri kjo i detyrohet sidomos nivelit ende të lartë të kredive të këqija dhe problemeve në disa sektorë specifikë të biznesit, sidomos në segmentin e korporatave.

Edhe në vendet e tjera të Rajonit oferta ngelet e shtrënguar, por këtu kanë një ndikim më të lartë kufizimet rregullatore, sidomos për bankat e zonës euro apo që ju përkasin grupeve bankare të eurozonës.

Njëlloj si në Shqipëri, kreditimi kudo në rajon po udhëhiqet nga segmenti retail, që përfshin individët dhe bizneset e vegjël. Dhënia e kredive në vlera më të ulëta ju mundëson bankave një shpërndarje më të mirë të rrezikut, në kushtet kur cilësia e portofolit ngelet shqetësuese dhe trysnia e kërkesave rregullatore është gjithnjë e më e fortë.

Këto të dhëna dëshmojnë se rritja e kreditimit nuk është problem i izoluar kombëtar, por përballet me sfida të ngjashme në të gjithë vendet e Europës Qendrore dhe Juglindore.

Ersuin Shehu/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.