Rritja e naftës ringjall interesin grek për eksplorim – Athina do të përshpejtojë kërkimet në Jug të Kretës dhe në Detin Jon
Përpjekja e Europës për të ndaluar blerjen e gazit rus pritet të sjellë ndryshime rrënjësore të hartës energjitike të kontinentit dhe ka rindezur interesin e Greqisë për të kërkuar për hidrokarbure në ujërat që lagin ishullin e Kretës dhe në detin Jon.
Sipas mediave lokale në Greqi, Athina po mbështetet tek procedurat e shpejta për rinisjen e eksplorimit në 3 blloqe, ku vlerësohet se ka rezerva të mëdha të hidrokarbureve.
Kryeministri Kyriakos Mitsotakis, theksoi në parlament vendosmërinë e qeverisë për të eksploruar zonat në Jug të Kretës dhe në detin Jon, në mënyrë që të ofrohet një panoramë e pastër për ndonjë rezervë të gazit, dhe të vazhdohet me shfrytëzimin, nëse do të ketë përfitueshmëri për Greqinë.
Mitsotakis sugjeroi se vendimet dhe afatet kohore për nisjen e eksplorimit të 2 blloqeve në Jug të Kretës do të lajmërohen këtë Javë. Këto zona i janë dhënë konsorciumit Total-ExxonMobil-Helenic Petroleum, ndërsa në Detin Jon, vetëm firmës Hellenic Petroleum.
Hetimi i mëtejshëm i këtyre rezervave të mundshme, mund të kërkojë të paktën 2 vitë e gjysmë, përmes sondazheve sizmike dhe shpimeve, me një kosto prej 150 milionë dollarë për bllok.
Në ditët në vijim, qeveria greke pritet t’i japë kontraktorëve një sinjal të fortë të vendosmërisë, që nuk ekzistonte më parë, për shkak të rënies së çmimeve të naftës dhe gazit në vitin 2019 dhe 2020.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.